龍劍笙留港過年 陪107歲阿媽打麻雀

【on.cc東網專訊】 
今日是大年初一，龍劍笙（阿刨）跟一眾戲迷拜年，祝大家身體健康，心想事成！已有幾年沒留港過農曆新年的她，趁剛完成一連十六場《紫釵記》全劇，加上107歲的母親叫她一起過年，所以阿刨到初四才返回加拿大溫哥華。離港前，她相約好友丘亞葵（Vigo），以及有份演出《紫釵記》的鄭雅琪、李沛妍、黎耀威和梁煒康等一眾新秀食開年飯，慰勞一眾後輩，難怪席間眾人有講有笑，不時分享演出期間的點滴。

新秀從阿刨身上學習

見到後輩茁壯成長，阿刨嫣然一笑：「呢幾位年青演員，好用心，佢哋本身演出經驗好豐富，只不過我哋多咗排練，溝通多咗！至能演得有咁好效果。」問怎樣培育下一代發展粵劇？她謙虛說：「我唔敢講培育，自己仍有好多不足地方，我繼續學習，反而多謝佢哋同我一齊演出，佢哋非常用心演，大家配合得好，每晚都有唔同感動位，我從觀眾反應就知道，見到大家不斷進步，好開心！」至於一眾新秀異口同聲表示從阿刨身上，學懂很多東西，特別是演員與觀眾之間的交流，令他們終生受用。

讚媽媽打牌叻

談到今個新年留港怎樣過？阿刨表示十分簡單，就是多陪母親打牌：「幾年冇喺香港過年，媽媽叫我留低過埋年先走，好開心，大家多時間相聚。就陪佢打麻雀，托賴佢好精神，雖然打嘅時間唔長，唔會話打八個圈，但佢好精靈，牌就搵人摸，佢就指揮打邊隻，107歲喇，好犀利！」問誰贏得多？阿刨說：「佢識自摸，牌又高章，而我哋同佢打規定自摸先食得，所以佢贏得多！」

至於身為後輩的鄭雅琪、黎耀威和梁煒康在新年期間忙不停，繼續參與其他演出，黎耀威和梁煒康更自編自演新派粵劇《飯冰冰舞會佩夫人》，實行反串扮花旦，氹公公婆婆開心過年。
http://hk.on.cc/hk/bkn/cnt/entertainment/20160207/bkn-20160207205516119-0207_00862_001.html